Герейхан Аджиев
Аталарым ат чапдыргъан тюзюмде
Урлукъларын чачгъан сенсен дослукъну.
Язда ашлыкъ чачып, оруп гюзюнгде
Бежени де болдунг элде моллукъну.
Къойсув бойда къой багъыла, къарайман,
Топурагъынгны жува суву Терикни.
Каспий денгиз ягъаларынг ялайгъан,
Бабаюртум, болдунг еси юрекни.
Бу якъларда къой отлатгъан Мюнкюллю,
Макъсуманым йылкъыларын чубургъан,
Эр юрекли Элдарушум, Зорушум,
Къылыч чабуп, гирген къара къабургъа.
Бу якъларда къумугъумну тамуру
Терен гетген, асру сезген хатлары.
Бабаюртум, биз ер этсек абурунг,
Кюлемесми артыбыздан ятларынг?!
Тюзюнг эркин, эркин йимик юреги
Къумугъумну, эркелетген тёрюнгде,
Балдай басып, берген гесек чёрегинг
Токъ этгенлер мунда эркин гёрюне.
Къумукътюзню Байтереги – Бабаюрт,
Къумугъумну асырагъан гьайлеги.
Сени булан яшав таба минг умут,
Сени булан бай къумукъну юреги.
Бугюн сёзлер эркин геле тамаша,
Бугюн барынг ярыкъ эте юзюмню:
Бабаюртум, тюрлен, яша, минг яша,
Аркъалыгъы болуп Къумукътюзюмню!
